M.M.THREE
મેલૂડી ચાદર ધોય
ગુરુએ ખોદાવી રે વાવડી,
જેના નીર તો ગંગાજળ કોય,
સમજ મનવા, મેલૂડી ચાદર ધોય જી.
વણ ધોયે દુ:ખડાં ઊપજે,
તારો તરણો શેની વિધે હોય ?—
મનવા, મેલૂડી ચાદર ધોય જી.
તન મન કી તું તો કર લે મટકી,
થારી કરણીની કુંડિયા હોય જી.
શબદુરા ઝટકા રે દીજીએ
એવી સુરતી શિલા પર ધોય–
મનવા, મેલૂડી ચાદર ધોય જી.
રોપડો રંગે ફૂટડો જેનાં
અજબ રંગીલાં ફૂલડાં હોય જી,
ઊભો સૂકે પરભોમમાં એની
કળિયું ન ત્રોડે રે કોય.–
મનવા, મેલૂડી ચાદર ધોય જી.
ચંદન રંગે રે સામળો એનાં
મરમ જાણે રે સંત કોય જી,
કાપ્યા પછે કંચન નીપજે એનાં
મૂલ અમૂલખ હોય.—
મનવા, મેલૂડી ચાદર ધોય જી.
દેખતડો રે પંથ દોયલો,
એમાં ચાલતડાને સુખ હોય જી,
સંતનાં વોળાવાં રે લીજીએ
એમાં વિઘન ન આવે કોય.–
મનવા, મેલૂડી ચાદર ધોય જી.
ભમર ગુફામેં રે ભમે ભમરા,
જ્યાં અલેખના અખેડા હોય જી,
લખમા માળી ની રે વિનંતિ
ગુરુગમ વિના જોય ન કોય.–
મનવા, મેલૂડી ચાદર ધોય જી.
Leave a comment