લોકગાયક ગુજરાતી… માણવાલાયક શૃંખલા
આમ તો દૂરદર્શનની ગુજરાતી ચેનલ ડીડી-11 જોવાનો સમય ત્યારે જ આવે છે જ્યારે કોઈ મિત્ર અથવા ઓળખીતાનો કાર્યક્રમ હોય અને એની જાણકારી અગાઉથી મળી હોય. આ સિવાય સરકાર દ્વારા ફરજીયાત એકથી દસમાં રહેલી એ ચેનલનો નંબર ભાગ્યે જ આવે છે.
આવામાં ઈ-ટીવી ગુજરાતી પર હાલમાં શરૂ થયેલી કાર્યક્રમ ‘લોકગાયક ગુજરાતી’ની દ્વિતિય શૃંખલા જોવાની ખૂબ મજા આવે છે. આમ પણ ‘આપણી રસોઈ’ અને હવે ‘ફ્લેવર્સ ઓફ ગુજરાત’ દ્વારા અમારા પરિવારમાં આ ચેનલ મહિલાઓ દ્વારા જોવાય જ છે, એટલે લોકગાયક ગુજરાતીની આ દ્વિતિય શૃંખલા શરૂ થવાની માહિતિ મળી.
દર શનિવાર અને રવિવારે સાડા સાત વાગ્યે સાંજે પ્રસ્તુત થતો આ અનોખો કાર્યક્રમ ઝી ટીવીના હિન્દી ગીતો માટેના ‘સા..રે..ગ..મ’ અથવા એ પ્રકારના કોઈ પણ હિન્દી ગીતોના કાર્યક્રમની સરખામણીએ ઉભો રહી શકે તેવો અને તેનાથી વધુ ‘સામાજીક’ મૂલ્ય ધરાવતો સરસ કાર્યક્રમ છે, કારણ કે એ ગુજરાતનો પોતાનો કાર્યક્રમ છે.
વત્સલાબેન પાટીલ અને બિહારીભાઈ ગઢવી જેવા જાણકાર નિર્ણાયકો, શ્રી કીર્તિદાનભાઈ ગઢવી દ્વારા કરાતું સુંદર સંચાલન અને સાથે સાથે ગવાયેલ ગીતો વિશે અપાતી સમજણ આ કાર્યક્રમની વિશેષતા વધારી દે છે. મોટેભાગે ડાયરાઓમાં અને લોકગીતોના જાહેર કાર્યક્રમમાં એવું અનુભવાયુ છે કે ખૂબ વધારે પડતુ ઘોંઘાટની લગોલગ પહોંચી જતુ સંગીત એ લોકગીતના શબ્દોને અને તે દ્વારા તેના મર્મ સુધી પહોંચવામાં અડચણ આપે છે ત્યારે આવી સુંદર પ્રસ્તુતિ લોકગીતો વિશેની સમજણ પણ વધારશે એવી આશા અસ્થાને નહીં ગણાય.
આ શોની પ્રથમ શૃંખલા પૂર્ણ થયા પછી તેના પ્રથમ ક્રમાંકિત ગાયકોને લોકગીતોના ક્ષેત્રમાં નામના મળી છે, કાર્યક્રમોમાં તેમને બોલાવાય છે અને એ રીતે એમને વ્યવસાયિક રીતે પણ ફાયદો થાય છે. આ પ્રકારના શો ગુજરાતી ચેનલ પર શરૂ થાય, પ્રચલિત થાય અને સાથે સાથે આટલો વ્યવસ્થિત રીતે ચાલી શકે, લોકોનો પ્રેમ પામી શકે અને ખૂબ સફળ પણ નીવડે એ આનંદની વાત છે.
I am young man of 77+ years
પ્રતિસાદ આપો