પપ્પા, તો હવે ફોન મૂકું// મનહર ત્રિવેદી

તો, પપ્પા !હવે ફોન મૂકું?**મનહર ત્રીવેદી

તમને એ મોજ જરી આવે
તે થયું મને
એસ.ટી. ડી.ની ડાળખીએ ટહુકું !
હોસ્ટેલને?….. હોસ્ટેલ તો ફાવે છે……
જેમકે કાંટામાં સચવાતું ફૂલ
તોયે એ તો ઉઘડે છે…..
રંગભર્યું મહેકે છે…….
ડાળખીમાં કરે ઝૂલાઝુલ….
ફાગણના લીલા કુંજાર
કોઇ ઝાડવાનું પાન
એમ થાય નહીં સૂકું,
તો પપ્પા, હવે ફોન મૂકું?
મારી બા જલ્સામાં?…..
બાજુમાં ઊભી છે?…..
ના,ના, …….
તો વાસણ છો માંજતી
કે’જો
આ દીકરીએ તારા સૌ સપનાઓ
રાત પડે નિંદરમાં આંજતી,
સાચવજો…..
ભોળી છે…..
ચિંતાળુ……..
ભૂલકણી…….
પાડજો ના વાંકુ કે ચૂકું
તો પપ્પા,
હવે ફોન મૂકું?
શું લીધું?…….
સ્કૂટરને?……
શમ્મુ તો કે’તો તો…..
ફ્રીજ શું લીધું?…..
સ્કૂટરને…
ભારે ઉતાવળા,
કેવા છો જિદ્દી?

ને હપ્તા ને વ્યાજ?…
વળી,
ઘર આખ્ખું ઠાલવશે ખીજ
ઝાઝી તે વાતોના ગાડા ભરાય!
કહુ, હાઇકુમાં,
એટલે કે ટૂંકુ,
તો પપ્પા
હવે ફોન મૂકું?